Nýliðaferð í Setrið

Mán Mar 8 20:13:25 GMT 2004

Skúli setti ferðasögu á vefspjall 4x4. Hér eru nokkrar myndir úr ferðinni.

Fim Mar 4 07:50:27 GMT 2004

Nánari útfærsla á áætlun.

Fimmtudagur kl. 20:00
Lokafrestur til að staðfesta þátttöku. Þátttakendalisti með skiptingu í hópa aðgengilegur á netinu. Mönnum er bent á að prenta þennan lista og taka með sér í ferðina.

Fimmtudagur kl. 21:00-22:00
Fararstjórar verða í Mörkinni, þar gefst tækifæri til að ræða nánar um fyrirkomulag ferðarinnar.

Laugardagur kl. 8:30
Farið frá Hrauneyjum, yfir brú hjá kláfnum á Tungná og eftir Búðarhálsi, yfir Þjórsá við Sóleyjarhöfða og í Setrið. Vonandi verðum við komin þangað fyrir hádegi. Það lítur út fyrir að það verði þokkalega bjart veður á laugardeginum, þá verður stefnan tekin á Hofsjökul.

Það hefur verið nokkur úrkoma á þessum slóðum undanfarna daga, hitastigið í Setrinu, sem er í 700 metra hæð yfir sjávarmáli, var þá á bilinu 0 til +2 gráður. Því má búast við nýsnævi og frekar þungu færi, þegar kemur upp fyrir 900 m hæð á jöklinum. Hábunga Hofsjökuls er í 1800 m hæð. Ef okkur tekst að komast þangað, þá yrði það nýtt hæðarmet fyrir nýliðaferðir á vegum 4x4. Fyrra met var sett í ferðinni á Grímsfjall.

Um kvöldið verður grilluð sameiginleg máltíð í Setrinu.

Sunnudagur.
Nú lítur út fyrir rigningu og sunnan kalda eða stinningskalda á sunnudaginn, Meðal valkosta fyrir heimleiðina er að fara til baka yfir Sóleyjarhöfðavað og Klakksleiðin sem liggur fyrir sunnan og austan Kerlingarfjöllin. Reiknað er með að koma til Reykjavíkur fyrir háttatíma á sunnudagskvöld, fyrr ef veður verður leiðinlegt.

Þri Mar 2 23:20:31 GMT 2004

Hér er listi yfir þá sem hafa staðfest þátttöku, með skiptingu í hópa.

Veðurspár fyrir helgina halda áfram að batna, nú lítur út fyrir ágætis veður bæði á laugardag og sunnudag.

Þri Mar 2 09:53:01 GMT 2004

Nú er komið að þvi að greiða þátttökugjöld vegna nýliðferðar í Setrið.

Vegna þess að nú er aðeins ein gistinótt innifalin, hefur gjaldið verið lækkað í 2500 krónur fyrir hvern einstakling, 17 ára og eldri. Ekki þarf að greiða vegna barna, 16 ára og yngri. Innifalið í gjaldinu er m.a. gisting og sameiginleg máltíð á laugardagskvöld.

Reikningsnúmer vegna greiðslu hefur verið sent í tölvupósti. Menn eru beðnir greiða fyrir hádegi á morgun, miðvikudaginn 3 mars. Tíu bílar eru skráðir á biðlista, þeim verður gefinn kostur plássum þeirra sem ekki greiða fyrir frestinn.

Þeir sem greiða í heimabanka eru beðnir að setja fjölda og nöfn fullorðinna farþega/aðstoðarökumanna, og nöfn og aldur barna, í skíringuar texta. Ef nafn þess sem greiðir, er ekki það sama og á skráningu, þarf það líka að koma fram. Þeir sem greiða í banka, eru beðnir að senda þessar upplýsingar í tölvupósti á eik@klaki.net

Ef menn hætta við þátttöku í ferðinni, þá eru þeir beðnir að láta vita eins fljótt og kostur er.

Mán Mar 1 14:55:48 GMT 2004

Vegna óvissu um færð á leið í Setrið, ætlum við að breyta áætlun lítilsháttar, þannig er að ferðin hefjist klukkan 8:30 á laugardagsmorgni í Hrauneyjum. Menn geta ráðið því hvort þeir gista þar aðfaranótt laugardags. Með þessu móti höfum við dagsbirtu á leiðinni í Setrið.

Ég hallast að því að fara Búðarhálsinn, frekar en að brölta um vatnsrásirnar vestan Þórisvatnsins, og ef okkur líst ekki á Sóleyjarhöfðavaðið, þá er hægt að fara yfir Þjórsá norðar, jafnvel á stíflunni.

Færið er mjög hart núna og það er óvist að það breytist mikið fram að næstu helgi, enn sem komið er hefur ekki hlánað við Setrið og það hefur verið óveruleg úrkoma.

Eins og spárnar eru núna lítur út fyrir vægt frost á hálendinu eftir miðvikudag, nema kannske á laugardaginn. Annars lítur spá bresku veðurstofnunnar fyrir laugardaginn alls ekki illa út.

Á morgun verður byrjað að rukka þátttökugjöld vegna ferðarinnar.

Fös Feb 27 09:35:22 GMT 2004

Á lista yfir skráningar er hægt að sjá í hvaða röð menn eru skráðir. Gert er ráð fyrir að 24 bílar eða 60 hausar komist í ferðina.

Fös Feb 27 00:11:17 GMT 2004

GPS upplýsingar eru komnar á vefinn. Það lítur út fyrir úrkomu og hlýindi í byrjun næstu viku, vonandi lægir og kólnar þegar líður að helginni. Ætlunin er að þátttakendur greiði þátttökugjaldið n.k. þriðjudag (2/3), þá kemur í ljós hversu margir af þeim sem eru á biðlista komast með.

Þri Feb 10 12:52:40 GMT 2004

Ný tímasetning: helgin 5-7. mars.

Það lýtur út fyrir hita yfir frostmarki og rigningu á hálendinu fram yfir helgi þannig að það er hætt við að bleyta og krapi verði til trafala. Einnig er hætt við náttúruspjöllum ef farið er þar sem jörð er auð.

Langtíma veðurspáin er svona fyrir helgina:
Föstudag og laugardag: Sunnan og suðaustan 10-15 m/s og rigning eða súld, en heldur hægari og úrkomulítið norðaustantil. Hiti 4 til 10 stig.
Á sunnudag: Suðvestlæg átt og skúrir eða él, einkum sunnan- og vestantil. Kólnar í veðri.

Setrið er bókað næstu tvær helgar, en það er búið að taka helgina 5-7 mars frá fyrir okkur.

Mán Feb 9 08:48:37 GMT 2004

Eldsneytispunktar:

Það er hægt að kaupa eldsneyti í Hrauneyjum. Eftirfarandi tafla gefur vísbendingar um það eldsneyti sem æskilegt er að menn hafi frá Hrauneyjum:

Díseljeppar:	100-140 lítrar	Fer eftir þyngd bíls
Bensínbílar:	120-220 lítrar	Eftir vélarstærð og þyngd.

Eins og menn hafa tekið eftir, þá hefur orðið breyting á veðri frá því sem verið hefur undanfarnar vikur. Næstu daga lítur út fyrri sunlægar áttur með úrkomu og hitastig á hálendinu nærri frostmarki. Helgarspáin frá veðurstofunni er svohljóðandi:

Á föstudag: Stíf suðaustlæg átt og slydda eða rigning, en þurrt norðaustantil fyrri hluta dags. Hiti 2 til 8 stig, hlýjast suðvestanlands.

Á laugardag og sunnudag: Suðvestlæg átt og skúrir eða él, einkum sunnan- og vestantil. Kólnar aftur í veðri.

Þarna er sem sagt spáð leiðinda veðri á föstudag en batnandi þar eftir.

Ef veðurhorfur versna ekki verulega, þá ætla ég að senda þeim sem skráðu sig fyrir síðastliðinn fimmtudag upplýsingar um reikningsnúmer um hádegi á morgun. Þeir fá einn sólarhring til að leggja þátttökugjald inn á rekninginn, verði þá laust í ferðina verður þeim skráðu sig seinna, og eru á biðlista, gefinn kostur á að greiða.
Munið að athuga tölvupóstinn eftir hádegi á morgun, þriðjudag.

Fös Feb 6 10:17:36 GMT 2004

Fullbókað er í ferðina. Hægt er ræða það sem viðkemur ferðinni og koma með spurningar á spjallinu á vefsíðu Ferðaklúbbsins 4x4.

Upphafleg tilkynning

Í undirbúningi er nýliðaferð á vegum Umhverfisnefndar 4x4. Stefnt er að því að fara í Setrið helgina 13-15 febrúar næst komandi. Þeim sem hafa áhuga á þátttöku er bent á að skrá sig hér og að mæta í opið hús í Mörkinni klukkan 21:00 fimmtudagskvöldin 5. og 12. febrúar.

Drög að áætlun:

Safnast saman í Hrauneyjum að kvöldi föstudags, lagt af stað þaðan klukkan 20:00, farið í Setur um Sóleyjarhöfða. (Ath. brottför er frá hrauneyjum klukkan 8:30 laugardagsmorgun, sjá hér að ofan.)
Laugardagur notaður til að fræðast um umhverfið og leika sér í snjónum. Það vantar ekki tilefnin á þessum slóðum til að ræða umhverfismálin. Ef veður leyfir, þá verður Hofsjökull mátaður.
Sameiginleg máltíð á laugardagskvöld.
Þátttakendur mæta í Mörkina á fimmtudagskvöld, síðasti séns að greiða þátttökugjöld er þá.
Hámarks bílafjöldi er 24, þátttakendum skipt í hópa, 5-8 bílar í hóp.
Kostnaður: 3500 kr á mann, innifalið eru matur á laugardagskvöld og skálagjöld.
Kröfur um búnað miðast við að menn séu tilbúnir að aka á 3 pundum, og séu með talstöð, cb eða vhf, dráttarkróka og skóflu. Fararstjóri sker úr álitamálum.
Stefnt er á fara helgina 13-15 febrúar, en ferðinni verður frestað ef veðurhorfur eru óhagstæðar. Endanleg ákvörðun um frestun verður tilkynnt á þessari vefsíðu fyrir hádegi þriðjudaginn 10. febrúar.

Frekari upplýsingar eru veittar í opnu húsi í Mörkinni á fimmtudagskvöld eða í síma 690-3307.

Síðast uppfært 29. Október 2007.